«Наяснийшый, велможный и преславный царю московськый, а нам велце милостивый пане и добродию. Подобно с презрення божого тое ся стало, чого мы сами соби зычылы и старалыся о тое, абихмо часу теперишнього моглы чрез посланцов своих доброго здоровья вашей царськой велможности навидити и найнижшый поклун свой отдаты. Ажно Бог всемогущый здарив нам от твоего царського велычества посланцув, хоч не до нас, до пана Киселя посланых в потребах его, которых товариши наши козакы в дорози натрафившы, до нас, до войска завернулы. Чрез которых радостно прыйшло нам твою царскую велможность видомым учыныты оповоженю виры нашои старожытной греческой, за которую з давних часов и за волности свои крываве заслужонии, от королей давних надание помыр[ем] и до тых час от безбожных ариян покою не маем.[Тв]орець избавитель наш Исус Христос, ужаловавшысь кривд убогых людей и крывавых слиз (примечание. слез) сырот бидных, ласкою и милосердем своим святым оглянувшися на нас, подобно, пославшы слово свое святое, ратоваты нас рачил. Которую яму под намы былы викопалы, сами в ню ся обвалылы, вже два войска з великымы таборамы их помог нам Господь Бог опановаты и трох гетманов живцем взяты з иншымы их санаторамы: першый на Жолтой Води, в полю посеред дорогы запорозькои, комисар Шемберк и сын пана краковського ни з одною душею не втеклы. Потом сам гетман велыкый пан краковськый из невынным добрым чоловиком паном Мартином Калиновскым, гетманом полным коронным, под Корсуном городом попалы обыдва в неволю, и войско все их квартянное до щадку ест розбыто; мы их не бралы але тие люды бралы их, которые нам служылы [в той м]ире от царя кримского. Здалося тем нам и о том вашому [царському] велычеству ознайомыты же певная нас видомост зайш[ла от] князя Доминика Заславського, который до нас прысылал о мир просячы, и от пана Киселя, воеводы браславського, же певне короля, пана нашего, смерть взяла, так розумием, же с прычыны тых же незбожных непрыятелей это и нашых, которих ест много королямы в земли нашой, за чым земля тепер власне пуста. Зычылы бымо соби самодержца господаря такого в своей земли, яко ваша царская велможность православный хрестиянський цар, казали бы предвичное пророчество от Христа Бога нашего исполнылося, што все в руках его святое милости. В чом упевняем ваше царское велычество, если бы была на то воля Божая, а поспех твуй царскый зараз, не бавячися, на панство тое наступаты, а мы зо всим Войском Запорозьким услужыть вашой царской велможности готовисмо, до которогосмо з найныжшымы услугамы своимы яко найпыльне ся отдаемо. А меновите будет то вашому царскому велычеству слышно, если ляхи знову на нас схотят наступаты, в тот же час чим боржей поспешайся и з своей стороны на их наступаты, а мы их за Божею помощу отсул возмем. И да исправит Бог з давних виков ознайомленное пророчество, которому мы сами себе полецевши, до милостивых нуг вашему царскому велычеству, яко найуныженей, покорне отдаемо.

Дат с Черкас, июня 8, 1648.
Вашему царскому велычеству найнызши слуги.

Богдан Хмельницкий, гетман з Войском его королевской милости Запорозким".